गणेशोत्सवाच्या पवित्र पर्वावर आणि गणेश चतुर्थीच्या या शुभदिनी *'यशवंत प्रश्नमाला'* या शैक्षणिक ब्लॉगच्या प्रवासात एक अत्यंत आनंदाचा व अभिमानाचा सुवर्णक्षण आला आहे. आपल्या लाडक्या बाप्पाच्या आगमनाच्या मांगल्यासोबतच या शैक्षणिक ब्लॉगने १० लाख भेटींचा टप्पा यशस्वीरीत्या पूर्ण केला आहे.
महाराष्ट्रातील हजारो विद्यार्थी, शिक्षक आणि पालकांच्या विश्वासातून साकारलेला हा प्रवास आज एका मोठ्या वटवृक्षात रूपांतरित झाला असून, हा कृतज्ञता सोहळा शब्दांत व्यक्त करणे मनाला सुखावणारे आहे. डिजिटल माध्यमातून ग्रामीण व शहरी भागातील विद्यार्थ्यांपर्यंत शिक्षणाची गंगा पोहोचवण्याच्या उद्देशाने १५ जुलै २०२५ रोजी, माझ्या वाढदिवसाचे औचित्य साधून मी *'यशवंत प्रश्नमाला'* या शैक्षणिक ब्लॉगची निर्मिती केली होती.
*'यशवंत प्रश्नमाला' ही फक्त वेबसाइट किंवा ब्लॉग नाही. तर विद्यार्थ्यांच्या स्वप्नांना दिशा देणारी, शिकण्यात मजा आणणारी आणि आत्मविश्वास वाढवणारी डिजिटल पायरी आहे. इथे अभ्यास आहे, पण दडपण नाही. इथे परीक्षा आहे, पण भीती नाही. आहे ती फक्त — शिकण्याची मजा आणि शिकण्याचा विश्वास.* या मुख्य हेतूने सुरू झालेल्या या प्रवासाने अल्पावधीतच १० लाख भेटींचा पल्ला ओलांडला आहे, ज्याचे संपूर्ण श्रेय महाराष्ट्रातील विद्यार्थी मित्रांना, मार्गदर्शक शिक्षकवृंदाला आणि पालकांना जाते.
विद्यार्थ्यांच्या शालेय स्पर्धा परीक्षेतील यशाला बळ देण्यासाठी आणि त्यांच्यात स्पर्धात्मक गुणवत्ता निर्माण करण्यासाठी या ब्लॉगवर सातत्याने विविध नाविन्यपूर्ण उपक्रम राबवले गेले. इयत्ता पहिली ते पाचवीच्या गुणवत्ता शोध चाचणीची तयारी असो, विद्यार्थ्यांचा सराव अखंडित ठेवण्यासाठी प्रत्येक रविवारी घेतली जाणारी साप्ताहिक चाचणी असो किंवा महापुरुषांच्या विचारांची ओळख करून देणारी जयंती व पुण्यतिथी विशेष प्रश्नमंजुषा असो. प्रत्येक उपक्रमाने विद्यार्थ्यांना भरघोस असा लाभ मिळवून दिला. याशिवाय, विद्यार्थ्यांची भाषिक समृद्धी वाढवण्यासाठीचा 'शब्दसंपदा' उपक्रम, मार्गदर्शनासाठी मागील वर्षांच्या प्रश्नपत्रिकांचे संकलन आणि TET व CTET परीक्षेच्या तयारीसाठी उपलब्ध करून दिलेले ऑनलाईन प्रश्नपत्रिकांचे दालन यामुळे हा ब्लॉग अत्यंत लोकप्रिय ठरला.
आज मागे वळून पाहताना मन अभिमानाने भरून येते. *'यशवंत प्रश्नमाला'* हा केवळ एक ब्लॉग न राहता शेकडो शिक्षक व विद्यार्थ्यांच्या यशाचा एक विश्वासू साथीदार बनला आहे. विद्यार्थी मित्रांनी ज्या उत्साहाने नियमितपणे प्रश्न सोडवले, शिक्षकवृंदांनी ज्या आपुलकीने शाळांमध्ये व वर्गांमध्ये या ब्लॉगचा वापर केला आणि पालकांनी ज्या विश्वासाने पाल्यांच्या पाठीशी उभे राहून सहकार्य केले, त्याशिवाय हा प्रवास कधीही शक्य झाला नसता.
विघ्नहर्त्या गणरायाच्या चरणी हीच प्रार्थना आहे की, विद्यार्थ्यांच्या शैक्षणिक प्रगतीचा हा दीप असाच सतत तेवत राहो आणि आपल्या सर्वांच्या उत्स्फूर्त सहकार्याने *'यशवंत प्रश्नमाला'*' अधिक जोमाने ज्ञानदानाचे कार्य करत राहो. पुन्हा एकदा आपल्या सर्वांच्या सहकार्याबद्दल मनापासून आभार!
श्री. संदीप पाटील सर
*'यशवंत प्रश्नमाला'*
No comments:
Post a Comment